كل عيد يمر علينا اول يوم نقضيه زوارات عند الاهل ,ثاني يوم مطاعم ثالث يوم سنيما او سوق وننحكر بالزحمه وهاذي حالتنا
هالمره قلنا خل ننحاش من زحمه العيد ونروح شاليهات سليل الجهراء نغير جو
وصلنا طريق الجهرا وطق مطر قوي مشالله بس بو دقيقه ما مداني طلعت تلفوني بصور جان يوقف المطر بس هم نعمه العوض ولا القطيعه 
هاذي الخريطه
وصلنا الجهرا بالسلامه ,المكان مقسم اربع اقسام :فندق, مجمع مجكنم “صغير”, شاليهات ,قرية 99 “نفس العاب الشعب” وكلهم مبطلين على بعض تقدرون تروحون لهم مشي بس لانه عيد كانوا مسكرين المرات بينهم مايبون يصير لويه
اول شي دخلنا رسيبشن الفندق اكدنا حجز الشاليهات وخذينا مفاتيحنا وتوكلنا
المكان كان حده هادي وعائلي ما فيه لويه وهذا الي عجبنا
عندهم نوعين شاليهات الاول: غرفتين وصاله وحمامين ومطبخ تحضيري وحديقه خلفيه
النوع الثاني: ثلاث غرف وصاله و3 حمامات وغرفه خدامه ومطبخ تحضيري وحديقه اماميه
هاذي صوره لحديقه الشاليه الخلفيه
الجو كان اينن مشالله 
هالممر يودي لي المسابح 
طبعا مافي بحر !! بس حمام سباحه حق الكبار وحمام سباحه حق الصغار يعني المكان حلو حق الربيع او بدايه الشتا بس مو حلو حق صيف
في ملعب كره سله, ملعب كره طائره, ملعب كره قدم صغير للاطفال يشوق وحديقه فيها زحلاقيات والعاب نسيت اصورهم
في مصبغه خدمه ذاتيه او تطلبون منهم
الي عجبني المكان نظيف والاثاث مو مستهلك وايد والتنظيف أول بأول
في خدمه تطلبون الاكل من الفندق ويوصلون لكم الشاليه بس ما جربنا منهم
وفي بعد خدمة انترنت
الشاليه مجهز بكل الاساسيات تقريبا اذا نقصكم شي في مركز سلطان قريب يبيله 5 دقايق بالسياره موجود بمجمع اسمه الخيمه مول وهاذي خريطته عشان لا تحوسون مثل ما حسنا
]مايوفرون عدة شوي ,خذينا فحم سريع الاشتعال من مركز سلطان و بلشنا شوي
*Nom Nom*
بليل عالساعه 8 يبلشون مسابقات واغاني لليهال طبعا هذا بس كان للعيد ما اتوقع يسوون بالايام العاديه 
البوست في له تكمله انشالله انزله هاليومين 
Filed under: bs bel q8, Kuwait, Personal, reviews
