Qatar Trip Part 1 دار آل ثاني

الاسبوع الي طاف سافرت قطر لمدة 4 ايام أغير جو قبل الدوامات وهاذي أول سفره لي حق قطر مع إني من مواليد قطر

الرحله كانت على الخطوط القطريه اول مره اجربهم وانشالله مو اخر مره لانه مواعيدهم بالمليّ مو نفس ربعنا إحم

سفرتنا صادفت عطلة المولد النبوي والفنادق مشالله كلها كانت محجوزة بس الحمدالله حصلنا لنا حجز بالفور سيزن

الفندق تقريبا بعيد عن المطار 20 دقيقه او اقل بس موقعه حلو كل شي حوالينا  المتحف الاسلامي والسيتي سنتر وسوق واجف والاحلى غرفتنا تطل عالكورنيش المنظر كان خيال تبارك الرحمن

هذي صوره من بلكونة السويت

على ما وصلنا الفندق صارت الساعه 8 بليل يعني ما يمدي نروح مجمعات او اماكن ثانيه وبنفس الوقت ما كنا نبي نقعد بالفندق, سألنا الريسبشن عن اقرب مطعم وقالنا روحوا مطعم المرجان “لبناني” قعدتهم حلوه عالكورنيش

وعلى كلامه ان المطعم قريب قلنا نروح مشي لانه الجو حلو

مشالله منظر المباني بليل وايد حلوين والشوارع هاديه

هالمبنى لي الحين ما افتتحوه بس تصميمه يلفت وايد حلو مشالله 

طفنا دوار الشيراتون وصلنا الكورنيش , طبعا كورنيشهم ما يقارن باللي عندنا مشالله محافظين على نظافته والشوي ممنوع يعني ممنوع مو نفس بعض الكويتيين والمقيمين االي عندنا الله يسامحهم يشوون ويقطون فحمهم ووصاختهم عالزرع وهذا غير الي يشيشون

-

الحلو ان على طول الكورنيش تلقون سفن قديمه تقدرون تأجرونهم لمدة ربع ساعه تقريبا

وأخيرا وصلنا المطعم طلع مو قريب قريييب من الفندق ! الفندق صاير قبل الكورنيش بشوي والمطعم بنهاية الكورنيش المسافه مو شويه,تقريبا خذا منا 35 لي40 دقيقه مشي بس الجو كان حلو بليل ويساعد عالمشي

على ان القعدات الخارجيه كان فيها شيشه وزحمه بس القعده برا كلش ما تتطوف الجو والفيو عالبحرعجيب

المهم نرد حق الاكل طلبنا ووصل الاكل بسرعه خدمتهم حلوه ونفسيتهم تهبل

بالعاده اخر شي أفكر أطلبه دياي عالفحم لانه يكون ناشف وما ينبلع بس الي طلبته عندهم كان ترف بشكل مو طبيعي وحمص باللحمه ما مداني أطلع كاميرتي اصور الا نص الصحن طار مشالله من قال كنّا يواعه

   واختي طلبت شوربة عدس وايد حبتها وحتى المشاوي المشكله كانت حلوه ,بصراحه ألذ مطعم لبناني ذقته لي الحين

بعد ما استمتعنا بالاكل تكيسلنا ومافينا شده نرد الفندق مشي بعد , سألنا الويترس اذا عنده رقم تاكسي ويحليله قال لنا خلكم قاعدين وراح اتصل لنا على تاكسي وبأقل من 5 دقايق وصل وردينا الفندق

     ولي هني خلص اول يوم لنا بالدوحه تصبحون على خير وانشالله باجر انزل لكم بوست اليوم الثاني