صبــــــاح الخيــــر
التدوين..البلوق
كتبت موضوع طويييييييل ان هاذي بتكون أخر تدوينه لي وراح أوقف نهائيا بعدين هونت ومسحت كل الي كتبته لما وصلني إيميل من ووردبريس اني كملت 6 سنوات معاهم !
يمكن من الأسباب الي خلتني أوقف تدوين أخر فتره إن بعد التخرج روتيني تغير مع الوظيفه ..وبدال الوظيفه صار عندي وظيفتين وبلشت مشروعي الخاص الحمد الله فصار ما عندي وقت فراغ كبير نفس قبل مجابله البلوق او أيام قوقل ريدر 24 ساعه
وبعدين قلت مو بس الوقت الي ما يساعد أكتب .. حتى الناس ما قاموا يقرون ويعلقون نفس قبل
بالذات بهالفتره الي الغالبيه نسوا البلوقات واتجهوا لي الانستغرام وسناب جات.. واعترف انا وحده منهم ..مادري ليش ؟ يمكن لان استعماله اسهل؟
كل ما اتذكر التعليقات الحلوه والايميلات الي كانت توصلني اتحسف اني وقفت
كان ما يمر يوم الا وأدش البلوق واقرا تعليقات الناس وأرد عليهم او انزل مواضيع يديده تقريبا بشكل يومي او اقرا البلوقات الثانيه وأعلق على مواضيعهم
كان شي حلو…
طول الفتره الي طافت كنت افكر ارد اكتب واسوي ريفيو بعدين اهون واتكيسل اني اضبط الصور واكتب وكل يوم اقول باجر
بس تبون الصج ولهت على البلوق وودي اروح اي مطعم الحين واكتب عنه ريفيو… مابي اروح افينتات ولا ابي اروح مطعم معزومه
لا ابي براحتي اروح بالوقت الي يناسبني مع رفيجاتي او اهلي اصور واضحك واستانس وارد اكتب الريفيو على راحتي بدون ما التزم بوقت معين او بمجاملات..
بصراحه مادري اذا في أحد راح يقرا هالتدوينه ولا لا… بس الي متأكده منه اني راح ارد اكتب واسوي ريفيوات نفس قبل إنشالله :)
Filed under: Uncategorized 
